Vestmannaeyjar – Best geymda leyndarmál Íslands

Vestmannaeyjar eru eyjaklasi suður af Íslandi, samtals 15 eyjar og um 30 sker og drangar. Heimaey er stærst eyjanna og sú eina sem er byggð en þar er Vestmannaeyjabær með um 4.500 íbúa.

Eyjarnar hafa allar myndast í eldgosum, fyrir 10.000- 12.000 árum. Vestmannaeyjar eru á umfangsmiklu eldgosasvæði sem er um 38 km langt og 30 km breitt með 70- 80 eldstöðvum bæði neðansjávar og ofansjávar. En engar áhyggjur, síðast gaus 1973, Heimaeyjargosið og þar á undan 1967 þegar Surtsey myndaðist. Sem stóð yfir í fjögur ár og er því lengsta eldgos í sögu Íslands!

Dagsferð til Eyja

Vestmannaeyjar er fullkominn áfangastaður fyrir fólk sem vill komast frá fjölmenni og upplifa einstakt samfélag og þá náttúrufegurð sem þar ríkir.

Siglingin til Vestmannaeyja tekur um 35 mínútur aðra leiðina. Ef þú ert að ferðast frá Reykjavík, er það um 2 klukkutíma akstur til Landeyjahafnar. Herjólfur siglir sjö ferðir á dag milli Vestmannaeyja og Landeyjahafnar yfir vetrar tímann en átta ferðir á dag yfir sumar tímann.

Lundinn kemur

Stærstu lundabyggðir heims eru í Vestmannaeyjum. Það eru margir staðir í boði til að skoða Lunda bæði á sjó og frá landi og er gott úrval af ferðaþjónustuaðilum sem bjóða uppá skoðunarferðir.

Þegar skyggja fer í ágúst er komið að því að lundapysjurnar yfirgefi holurnar sínar, á leið til sjávar eiga pysjurnar til að fljúga oft að götuljósum bæjarins og enda jafnvel í einhverjum bakgarðinum. Því er orðinn mikil hefð í Vestmannaeyjum að hjálpfúsar hendur bæjarbúa, sérstaklega barna sem ganga um bæinn með pappakassa og safna þeim pysjum sem villst hafa. Síðan fara bæjarbúar daginn eftir með pysjurnar og sveifla þeim á loft þannig að þær grípi flugið og haldi til sjávar.

Sagan um Heimaeyjargosið

Sagan um stærstu náttúruhamfarinar í Íslandssögu segir frá Heimaeyjargosinu sem hófst 23. janúar 1973 og stóð yfir til 3. júlí 1973 en þar sem megin eldvarpið varð stendur nú Eldfell. Hraun og aska eyðilögðu þriðjung byggðarinnar í Eyjum, eða tæplega 400 hús og byggingar. Meðan á gosinu stóð var mikil óvissa um það hvort nokkurn tímann yrði aftur mannabyggð á eyjunni.  ELDHEIMAR er gosminjasýning sem miðlar fróðleik um atburðarásina.

Frábærir viðkomustaðir í Vestmannaeyjum

Náttúruperlan Vestmannaeyjar hefur upp á fjölmarga fallega staði að bjóða þar sem ljósmyndalinsan nýtur sín.

Fílasteinninn eða The Elephant rock, er eflaust sá staður sem flestar myndir eru teknar af hérna í Vestmannaeyjum, enda engum líkur.
18 holu golfvöllurinn okkar er með fallegri golfvöllum landsins og hefur hann fengið mikið lof fyrir náttúrufegurð og dregur sífellt fleiri golfáhugamenn til Vestmannaeyja. Einnig hefur hann verið valinn af GolfDigest einn af 200 flottustu völlum Evrópu.
Stafkirkjan sem stendur á Skansinum er gjöf frá Noregskonungi í tilefni aldarafmælis kristnitöku Íslendinga í júlí árið 2020. Kirkjan er eftirmynd fyrstu kirkju Vestmannaeyja sem byggð var rétt fyrir kristnitöku árið 1000.
Sundlaugin okkar er eflaust ein sú besta á landinu. Þar er hægt að synda í saltvatnslaug, slaka á í heitum pottum, gufubaði eða farið i spennuferð í einum af þremur rennubrautunum sem þar eru.
Sprangan, að spranga er oft talið vera þjóðaríþrótt Vestmannaeyjinga, þar sem galvaskir einstaklingar sveifla sér á milli klettanna eins og ekkert sé sjálfsagðara.
Stórhöfði, örugglega vindsamasti staðurinn á Íslandi og sumir segja jafnvel vindsamasti staðurinn í allri Evrópu, en útsýnið bætir það upp.
Klauf er svartsand strönd skammt frá Stórhöfða. Þar getur þú gengið um, safnað skeljum, eða bara notið útsýnisins, eða jafnvel verið sannur víkingur og skellt þér í sjósund. Mikilvægt er þó að gera sér grein fyrir að enginn heitur pottur er tilstaðar svo kannski er sniðugra að skella sér í sundlaugina.

Viðburðir í Vestmannaeyjum

Ávallt er mikið um að vera í Vestmannaeyjum, sérstaklega yfir sumartímann. Hver sem er, verður ekki svikinn ef hann mætir á þessa viðburði sem eru nefndir hér að neðan.

Puffin Run er árlegt utanvegahlaup sem fer fram í byrjun maí. Hlaupaleiðin liggur um stórbrotið landslag Vestmannaeyja, þar sem þátttakendur upplifa hrífandi útsýni, fjölbreytta náttúru og sérstaka orku eyjanna á meðan þeir takast á við skemmtilega en krefjandi hlaupabraut.
Sjómannadagurinn er haldinn hátíðlegur ár hvert enda Vestmannaeyjar gamalt sjávarþorp. Helgin er stútfull af dagskrá frá föstudegi til sunnudags. Á laugardeginum fara fram hátíðarhöld á Básaskersbryggju, þar sem keppt er í kappróðri, reiptogi ásamt ýmsu öðru. Um kvöldið er síðan dansleikur.
Goslokahátíðin er árleg hátíð sem haldin er í Vestmannaeyjum fyrstu helgina í júlí til að minnast lok eldgossins á Heimaey árið 1973. Það mætti jafnvel kalla þetta Menningarhátíð Vestmannaeyinga þar sem myndlist og tónlist er ofarlega á viðburðum helgarinnar. Á laugardeginum er samkoma við höfnina þar sem hljómsveit skemmtir mannskapnum. Þetta er sannarlega einstök hátíð þar sem íbúar og gestir skemmta sér konunglega. Við mælum með fyrir alla að upplifa Goslokahátíðina að minnsta kosti einu sinni.
Þjóðhátíð er án efa þekktasta og stærsta útihátíðin á Íslandi. Þessi einstaka þriggja daga hátíð hefur verið haldin frá árinu 1874. Stanslaus dagskrá er alla helgina, með allskyns uppákomum fyrir alla aldurshópa. Þrír hápunktar eru yfir helgina, sem byrjar með ótrúlegri brennu á föstudagskvöldinu, sturlaðri flugeldasýningu á laugardagskvöldinu og að lokum hinum fræga brekkusöng á sunnudagskvöldinu, þar sem sungin eru þekkt íslensk þjóðlög.
Þrettándinn og síðasti dagur jóla er haldinn hátíðlegur í Vestmannaeyjum. Þrettándaganga er farin um bæinn í fylgd Grýlu, Leppalúða, jólasveinannna og ýmissa skelfilegra trölla og álfa. Gangan heldur upp á Malarvöllinn í Löngulá, þar sem dansað er í kringum brennu með álfum, púkum og allskyns kynjaverum. Að lokum eru jólin kvödd með flugeldasýningu.